மக்கள் சீன புரட்சி அறிமுகம் - 7
ஷென் நுங் (அ) ஷென்னாங்
பான் கூ, பூமியையும் அதில் மனிதர்களையும் படைத்துப் பல ஆண்டுகளான கதையைக் கடந்த வாராம் பார்த்தோம்... அதை தொடர்ந்து மிருகங்களை போலவே மனிதர்களும் நீண்ட காலம் வாழ்ந்து வந்தார்கள். இவர்களை நாகரிகப்படுத்துவதற்கு, தெய்வ அம்சம் பொருந்திய மன்னர்கள் ஒருவருக்கு பின் ஒருவராகத் தோன்றினார்கள் என்றும், அவர்கள் ஒவ்வொருவரும் பதினெட்டாயிரம் வருடங்கள் ஆண்டார்கள் எனவும் சீனர்களின் புராண கதைகள் தொடர்ந்தது. ஆனால் அதில் உள்ள மன்னர்களைச் சந்திப்பதும் சுவராசியம்தான். அதிலிருந்து பல பெயர்களில் துவக்கமாக்கும் வம்சங்கக்களில் விபரங்களை பார்க்கலாம்.
சூயி சென் என்ற ஒரு மன்னன் முதல் கதைகள் தொடர்கிறது. இவன்தான் நெருப்பைக் கண்டுபிடித்துக் கொடுத்தாக தகவல் உண்டு. இவன் காலத்திலிருந்துதான் மக்கள் உணவுப் பொருள்களை நெருப்பில் வேக வைத்துச் சாப்பிடத் தெரிந்து கொண்டார்கள். இந்த சூயி சென்னுக்குப் பிறகு பூ ஸி என்பவன் அரியணை ஏறினான்.
இவன் கி.மு 2852-ஆம் வருஷம் முதல் 2787-ஆம் வருஷம் வரையில் ஆண்டதாக தகவல் உண்டு. இவனது ஆட்சிக் காலத்தில்தான், வலைகள் வீசி மீன்கள் பிடிக்கவும், சில மிருகங்களை” வீட்டில் வைத்துப் பழக்கவும், சங்கீதம் பயிலவும், எழுத்துக்களை எழுதவும், ஆணும் பெண் திருமணம் செய்து கொண்டு வாழும் முறையையும் கற்றுக்கொண்டதாக கதைகள் உள்ளன.
பூ ஸிக்குப் பிறகு ஷென் நுங் (அ) ஷென்னாங் (神農). இதற்கு "தெய்வீக விவசாயி'’ அல்லது "தெய்வீக புருஷர்" என மொழிபெயர்க்கப்பட்டுள்ளது. இவர் பிறந்த ஜியாங் ஷினியன், சீனா மற்றும் வியட்நாமிய நாட்டுப்புற மதத்தில் தெய்வமாக மாறிய முதல் யான் பேரரசர் இவர். சீனாவிலும் வியட்நாமிலும் கலாச்சார நாயகனாகப் போற்றப்படுகிறார். வியட்நாமில், அவர் Thần Nông என்று குறிப்பிடப்படுகிறார். இவரது ஆட்சிக் காலம் கி.மு 2787 முதல் 2697-ஆம் வருஷம் வரை, இவர் காலத்தில்தான் விவசாயம் செய்யும் முறை பெருகியது என்பர். நோய்களை குணப்படுத்தக் கூடிய மூலிகைகளை உபயோகத்திற்குக்கா கொண்டு வரப்பட்டன. வைத்தியத் தொழிலின் தந்தை எனச் சீனர்கள் இவரை இப்போதும் கொண்டாடுகின்றனர்.
இப்பொழுதும் கூட, சீனாவிலுள்ள மருந்துக்கடைகள் பலவற்றிலும் இவன் உருவம் வைக்கப்பட்டுள்ளது. இவருக்கென்று கோவில்கள் உள்ளன. சீன மருத்துவத்திற்கு மட்டுமல்ல சீன விவசாயத்தின் தந்தை என்றும் இவர் அழைக்கப்பட்டார். உழவடை கருவிகள் பலதும் கண்டறிந்தார். இவர் குறித்த ஓவியம் இவர் கலப்பையுடன் இருப்பது போலச் சித்தரிக்கப்பட்டிருக்கும். அதுமட்டுமல்ல, குத்தூசி மருத்துவம் என்று அழைக்கப்படும் பழைமையான அக்குபஞ்சர் முறையை இவர்தான் உருவாக்கினார் என நம்பப்படுகிறது. அக்குபஞ்சர் மருத்துவ முறைக்கு ஆயிரம் ஆண்டு வரலாறு இருப்பதால் இது இவருடன் இணைக்கப்பட்டிருக்கலாம்.
சீன நாகரிகத்தின் பிதாமகன்: ஹுவாங்டி
ஹுவாங்டி
ஷென் நுங்குக்குப் பிறகு ஹுவாங்டி தனது பதினாறாவது வயதில் அரச பதவியேற்றார். சில கதைகள் இவர் 7 வயதில் பதவியேற்றதாகச் சொல்கின்றன. பண்டைய சீனாவின் புராணப் பேரரசர்களில் மூன்றாவதும், மற்றும் தாவோயிசத்தின் புரவலர் என்றும் அறியப்படுகிறார். கி. மு. 2697 முதல் 2597-ஆம் ஆண்டு வரை நூறு வருடகாலம் திறம்பட ஆட்சி நடத்தியதாக தகவல் உண்டு. இவருக்கு “மஞ்சள் சக்ரவர்த்தி! என்ற ஒரு பெயருண்டு. மஞ்சள் நதி பிரதேசத்தில் இவரது ஆட்சி நடைபெற்று வந்ததும் அதற்கு காரணம். சீன நாகரிகத்தின் பிதாமகன் எனவும் அழைக்கப்படுகிறார்.
தனது நாட்டை மாகாணங்களாகப் பிரித்து ஒவ்வொரு மாகாணத்திற்கும் ஒவ்வோர் அதிகாரியை நியமித்து, கடைசியில் எல்லா மாகாணங்களையும் ஒரு மத்திய அரசாங்கத்தின் நிர்வாகத்திற்கு கொண்டு வந்தார். ஒழுங்கான அரசாங்க அமைப்பு இவர் காலத்திலேயே ஏற்பட்டது. நிலங்களை அளவை செய்வது. கோயில்கள், அரண்மனைகள் கட்டும் பணிகளையும் செய்தார். வண்டியும் படகும், வில்லும் அம்பும், மரப்பாத்திரமும் மட்பாண்டமும் இவர் ஆட்சியில் புழக்கத்தில் வந்தது. நாட்களை குறிக்கும் நாட்காட்டி, நாணயச் செலாவணி, அலங்காரமான உடைகள், திசை காட்டும் கருவி என வராது ஆட்சியில் பலது உருவாக்கப்பட்டது.
தனது ஆட்சிக் காலத்தில் வரலாற்று ஆசிரியர்களை நியமித்து காலவரிசைப்படி வரலாறு எழுதும் முறையை உருவாக்கினார். வரலாறு எழுத ஆசிரியர்களை அரசவையில் முழு நேரமாக நியமித்த முதல் அரசர் இவர்தான். இந்த ஏற்பாட்டைப் பிற்காலத்து அரசர்கள் முறையாக பின்பற்றினார்கள். இதன் பின்னர்தான் ஒழுங்கான வரலாற்று நூல்கள் பல வெளிவரலாயின.
பட்டு துணி குறித்த புனைவு:
பட்டு உற்பத்தியின் தோற்றம் பற்றி பல கட்டுக்கதைகள் மற்றும் புனைவுகள் உள்ளன. கன்பூசியஸ் மற்றும் பிற சீனமரபு கதையென இரண்டு எழுத்துக்களும் பேரரசி லீசுவைப் பற்றிய ஒரு கதையைக் கூறுகின்றன. இவர்தான் ஹுவாங்டி மன்னனின் பட்டத்து அரசி. ஒரு நாள், ஒரு பட்டுப் புழுவின் பட்டுக்கூடு அவளது தேநீர் கோப்பையில் விழுந்தது. 14 வயது சிறுமியான அவள் தன் பானத்திலிருந்து அதை எடுக்க விரும்பினாள், கூட்டின் நூலை அவிழ்க்க ஆரம்பித்தாள்.
அந்த பட்டுக்கூடு உருவாக்கிய நீண்ட இழைகளைப் பார்த்த பேரரசி ஆச்சரியம் அடைந்தால்! மற்ற பாட்டுக்கூடுகளைச் சேகரித்து துணியில் நெய்தாள். தனது கணவர் ஹுவாங்டி பேரரசர் பரிந்துரையின் பேரில் பட்டுப்புழுவின் வாழ்க்கையை கவனித்த அவர், பட்டுப்புழுக்களை வளர்க்கும் கலையைத் தனது பரிவாரங்களுக்கு கற்றுக்கொடுக்க தொடங்கினார். பட்டுப்புழு வளர்ப்பு இந்த கட்டத்தில் இருந்து தொடர்ந்தது இதனால் பேரரசி லீசு சீன புராணங்கக்களில் பட்டு தெய்வம் ஆனார் எனக் கதை முடிகிறது.
ஹாுவாங்டி மன்னனுக்குப் பிறகு சுமார் 240 வருடங்கள் மிகவும் குழப்பமாக தொடர்ந்தது. எந்த விதத்திலும் ஆள தகுதியற்றவர்கள் அரசர்களென்று பெயர் சூட்டிக்கொண்டு ஆட்சி செய்தனர். கடைசியாக டீ ஷி என்ற ஒருவனுடைய கொடுங்கோலாட்சி தொடங்கியது. கொடுங்கோல் எத்தனை நாள் ஆட்சி செய்ய முடியும். விரைவில் அது நடந்தது. பிறகு சீன புராணங்கக்களில் புனைவு இன்னும் அழகாகத் தொடர்ந்தது.
(தொடர்ந்து பயணிக்கலாம்)
மக்கள் சீன புரட்சி அறிமுகம் - 1
மக்கள் சீன புரட்சி அறிமுகம் - 2
மக்கள் சீன புரட்சி அறிமுகம் - 3
மக்கள் சீன புராட்சி அறிமுகம் - 4
கருத்துகள் இல்லை:
கருத்துரையிடுக