மானுட விடுதலை...: பூமி உருவாக்கிய சீன தேசத்து கதை

ஞாயிறு, 17 நவம்பர், 2024

பூமி உருவாக்கிய சீன தேசத்து கதை

மக்கள் சீன புரட்சி அறிமுகம் - 6

பெரு வெடிப்பிலிருது மெல்ல மெல்ல மாற்றம்

மனிதன் படைத்ததில் கதைகள் சுவராசியமானவை ஆகும். அவைகளுக்கு எல்லைகள் இல்லை. எந்த கட்டுப்பாடும் இல்லை. அறிவியல் விழிக்கின்ற வரை ஆதி மனித கூட்டம் தனது கதைகளால் யுகங்களை கடந்து வந்தன. உலகின் எப்பகுதியில் வாழ்ந்தாலும் அக்கூட்டத்திற்குக் கதைகளே ஆதாரமாய் இருந்தன. அப்படிதான் உலகில் உள்ள மனித குழுக்கள் அனைத்தும் கதைகளை உருவாகின. இந்த பூமிப் பந்தின் தோற்றத்தைப் பல வடிவங்களில் மனிதன் கதைகள் மூலம் படைத்தான். அதுவே உண்மையென அடுத்து வந்த தலைமுறை நம்பவும் செய்தது. மனித படைப்புகள் குறித்தும் அப்படியே கதைகளை உருவாக்கினான். டார்வின் பரிணாம கொள்கையும், பெருவெடிப்பு தத்துவம் இவற்றை கதைகளாகவே மாற்றின.

பத்தாம் வகுப்பு சமூக அறிவியல் பாடம்

உயிரினங்களின் தோற்றம் பூமியின் தோற்றத்தோடு தொடர்புடையது. பெருவெடிப்புக் கோட்பாடு அண்டத்தின் தோற்றத்தை விளக்குகிறது. இக்கோட்பாடு, அண்டம் ஒரு பெரு வெடிப்பினால் 15 பில்லியின் ஆண்டுகளுக்கு முன் தோன்றியதாக முன்மொழிகிறது. அண்டமானது விண்மீன்கள், வாயு மேகங்கள் மற்றும் தூசிகளினால் ஆன விண்மீன் மண்டலங்களை உள்ளடக்கியது. வாயு மேகங்கள் தங்களின் ஈர்ப்பு விசை காரணமாக மோதிக் கொள்ளத் தொடங்கி, அணுக்களையும், துகள்களையும் உருவாக்கின. அப்போது சூரிய மண்டலம் உருவாகி இருக்கலாம். அணுக்கள், தூசித் துகள்கள் மற்றும் வாயு அடுக்குகள் திரளாக இணைந்து கோள்களை உருவாக்கின. இவை பால்வழி விண்மீன் திரளில் சூரிய மண்டலத்தை உருவாக்கின. ஏறக்குறைய 4.5 பில்லியின் ஆண்டுகளுக்கு முன்னால் பூமி உருவாகி இருக்கலாம் எனக் கருதப்படுகிறது. பூமி தோன்றிய 500 மில்லியன் ஆண்டுகளுக்குப் பின் உயிரினங்கள் தோன்றின என அறிவியல் நிரூபணம் செய்துள்ளது.

பான் கூ என்ற படைப்பாளியின் கதை

பான் கூ ஓவியம்

உலகில் உள்ள அனைத்து நாடுகளிலும், அனைத்து மொழிகளிலும் உலகம் பிறந்த கதை ஒன்று இருக்கும் அல்லவா? அவரவர் நாட்டின் கலாச்சாரத்திற்கு ஏற்றது போல அந்த கதை பின்னப்பட்டிருக்கும். சீன தேசம் மட்டும் விதிவிலக்கா என்ன? மற்ற நாடுகளைப்போல் சீனாவிலும் அதன் புராதனத்தைப்பற்றி கதைகள் பல உண்டு. ஒரே கதை வேறு வேறு வடிவங்களில் அவற்றில் ஒரு கதை இது. இந்த மூலக் கதை சீன கலாச்சாரத்திலிருந்து வந்தது. இந்த கதை முதன் முதலில் சுமார் 1,760 ஆண்டுகளுக்கு முன்பு எழுதப்பட்டது. தோராயமாக கிமு 220 – 265 ஆண்டில் எழுதப்பாட்டிருக்கலாம். ஆனால் அதற்கும் நீண்ட காலத்திற்கு முன்பே இக்கதை வாய்வழியாக சொல்லப்பட்டிருக்க வேண்டும். வாய்மொழி கதைகளே பின்பு எழுத்து வடிவம் கண்டன.

ஆதியில் குழப்பம் கொண்ட சூழல் நிலவியது. அப்போது ஒரு பெரிய முட்டை இருந்தது, யின் என்ற பெண்ணும் யாங் ஆணும் மட்டுமே இருந்தனர். செயல்பாடும் செயல்பாடு இல்லாமலும், குளிராகவும் சூடாகவும், இருளாகவும் ஒளியாகவும் ஈரமாகவும் உலர்ந்த நிலையிலும் கலவை நிலையில் எல்லாம் இருந்தது. இந்த யின் மற்றும் யாங்கிற்குள் இருந்த பூமி மற்றும் வானம் உட்படப் பல எதிர்நிலைகளில் குழப்பத்தைப் பிரிக்கும் விதமாக அங்கிருந்த மாபெரும் முட்டையிலிருந்து வெளிவந்தான் பான் கூ (班固 இது சீன மொழியில் பான் கூ ).

அப்போது வானம் இத்தனை உயரத்தில் இல்லை. முட்டையில் இருந்து வெளிவந்த பான் கூ நடுவில் நின்றார், தலை வானத்தைத் தொட்டது, அவரது பாதங்கள் பூமியில் பதிந்தன. வானமும் பூமியும் ஒரு நாளைக்கு 10 அடி என்ற விகிதத்தில் வளர ஆரம்பித்தன, பான் கு அவற்றுடன் சேர்ந்து வளர்ந்து வந்தார். இப்படியாக வளர்ந்து வளர்ந்து 18,000 ஆண்டுகளுக்கு பிறகு வானம் உயர்ந்து மேலே சென்றது. கீழே பூமி தடிமனாகப் பறந்து விரிந்து இருந்தது. பான் கூ இவைகளுக்கு இடையே 30,000 மைல் உயரத்தில் ஒரு தூண் போல நின்றார். எனவே வானமும் பூமியும் மீண்டும் சேர முடியாமல் ஆனது.

அதன் பிறகு ஒரு நாள் பான் கூ இறந்தபோது, அவரது மண்டை ஓடு வானத்தின் உச்சியாக மாறியது, அவரது சுவாசம் காற்று மற்றும் மேகங்களாக மாறியது, அவரது குரல் உருளும் இடியாக மாறியது. ஒரு கண் சூரியனாகவும் மற்றொன்று சந்திரனாகவும் மாறியது. அவரது உடலும் உறுப்புகளும் ஐந்து பெரிய மலைகளாக மாறியது, அவருடைய இரத்தம் கர்ஜிக்கும் தண்ணீரை உருவாக்கியது. அவரது நரம்புகள் சாலைகளாக மாறியது மற்றும் அவரது தசைகள் வளமான நிலமாக மாறியது. வானத்தில் எண்ணற்ற நட்சத்திரங்கள் அவருடைய முடி மற்றும் தாடியிலிருந்தும் உதித்தன, பூக்கள் மற்றும் மரங்கள் அவரது தோலில் இருந்தும் வந்தன. அவரது மஜ்ஜை முத்துகளாக மாறியது. பூமியில் உள்ள அனைத்தையும் வளர்க்கும் நல்ல மழை மற்றும் இனிமையான பனி போல அவரது வியர்வை வழிந்தது. அவருடைய உடம்பிலிருந்த பூச்சிகள் மற்றும் பேன்கள் மனிதக்குலத்தின் முன்னோர்களாகத் தோன்றினார்.

(பிரமாவின் தலையிலிருந்து பிராமணர்கள், தோளிலிருந்து சத்திரியர்கள், தொடையிலிருந்து வைசியர்கள், பாதங்களிலிருந்து சூத்திரர்கள் அதற்கும் அப்பாற்பட்ட பாவ யோனியிலிருந்து புலையர்கள் பிறந்ததாக இங்கும் கதை உண்டு தானே. ஆனால் என்ன இது வர்ணங்கள் பெயரால் மக்களை ஒதுக்கப் பிறந்த கதை)

டிராகன் உருவாக்கம்

கதை இன்னும் முடியவில்லை பான்‌ கூவின்‌ படைப்புத்‌ தொழிலுக்கு உதவியாக, பறக்கும்‌ பாம்பு ஒன்றும்‌, ஒரு பறவையும்‌, ஒரு ஆமையும்‌ இருந்தன. பறக்கும்‌ பாம்பு என்பது, நமது மரபில் யாளி என்று சொல்லும் வகையைச்‌ சேர்ந்தது போல இருக்கும். இதற்கு இன்றுவரை அதிக முக்கியத்துவம்‌ கொடுத்துப்‌ பேசுவார்கள்‌ சீனர்கள்‌.

மிகவும் சுவராசியமான அமைப்பு கொண்ட மிருகம் இது. ஒட்டகத்தின்‌ தலை, அதில்‌ இரண்டு மான்கொம்புகள்‌, ராட்சத‌ கண்‌கள்‌, பாம்புக்கழுத்து, புலியின்‌ பாதங்கள்‌, கழுகின்‌ நகங்கள்‌, நீண்ட மூக்கின்கீழ்‌ தாடி, அடர்த்தியான மயிருடைய வால்‌, மயிர்‌ நிறைந்த கால்கள்‌, உடம்பு பூராவும்‌ பொன்னிறமான செதிள்கள்‌, இவ்வகையாகத்‌ தோற்றமளிக்கும்‌ இந்த விசித்திர உருவம்‌தான் இப்போது வடிவம் கொண்டுள்ள டிராகன்.

இந்த டிராகன் தன்‌ வாயில்‌ எப்பொழுதும்‌ வெண் முத்துக்களை அடக்கிவைத்துக்‌ கொண்டு, அவ்வப்பொழுது, மனிதர்களின்‌ உபயோகத்திற்காக‌ பூமியின்‌ மீது உதிர்க்கிறது. நவரத்தினங்கள்‌ மீதும்‌, தங்கம், வெள்ளி முதலிய விலை மதிப்‌புடைய உலோகங்கள்‌ மீதும்‌ இதற்கு விருப்பம்‌ அதிகம்‌. ஆனால்‌ இரும்பை மட்டும்‌ வெறுக்கும்‌. அதுமட்டுமல்ல மேலே சொன்ன அங்க அமைப்புக்களில்‌ சில சில மாற்றங்‌களைக்‌ கொண்ட இந்தமாதிரியான உருவங்கள்‌ பல உண்டென்பதும்‌, இவை ஏரி, சமுத்திரம்‌ போன்ற நீர்‌ நிலைகளில்‌ வசிக்கின்றன. இவைகளே அவ்வப்பொழுது மழையைப்‌ பொழிய வைக்கின்றன என்பதும்‌ சீன மக்களின் நம்பிக்கை.

இந்த டிராகன் சில சமயங்களில்‌, சூரியனை விழுங்கப்‌ பார்க்கிறதென்றும்‌, அப்பொழுதுதான்‌ சூரிய கிரகணம்‌ ஏற்படுகிறதென்‌றும்‌ கூறுவார்கள்‌. சுருக்கமாக இதனை ஒரு தெய்வ மென்று கருதி சீனர்கள்‌ வழிபடுவார்கள்‌. பான்‌ கூ பூமியையும்‌ அதில்‌ மனிதர்களையும்‌ படைத்து‌ பல ஆண்டுகளாயின. மிருகங்களை‌ போலவே மனிதர்களும்‌ வாழ்ந்து வந்தார்கள்‌. இவர்‌களை நாகரிகப்படுத்துவதும்‌ ஒழுங்கான வழியில் நடத்திச் செல்வதும்‌ ௮வசியமாயின.

எனவே தெய்வ அம்சம் பொருந்திய மன்னர்கள்‌ பலர்‌ ஒருவருக்குப்பின்‌ ஒருவராகத்‌ தோன்றினார்கள்‌. ஒவ்வொருவரும்‌ பதினெட்டாயிரம்‌ வருடம் வீதம்‌ ஆண்டார்கள் எனக் கதை தொடர்ந்தது ஆனால்‌ மக்கள் சீனா குடியரசு உருவாகும் வரை ஆண்ட வம்சங்கக்கள் எவை எவை எனப் பார்ப்பது மிகவும் முக்கியத்துவம் வாய்ந்தது ஆகும். அதிலும் ஷென்‌ நுங்‌ மற்றும் ஹுவாங்‌ தீ இருவரும் நாம கட்டாயம் தெரிந்துகொள்ள வேண்டிய மன்னார்கள் ஆவார்கள். அடுத்த வாரம் அவர்களைச் சந்திக்கலாம்.